राहाता : साईबाबा संस्थानच्या वतीने या वषी श्रींचा पुण्यतिथी उत्सव करोनामुळे प्रतीकात्मक स्वरूपात साजरा करण्यात येत आहे. १४ ते १७ ऑक्टोबर या कालावधीत हा उत्सव साजरा करण्यात येणार आहे. या वेळी केवळ परंपरेनुसार आयोजित करण्यात येणाऱ्या प्रतीकात्मक भिक्षा झोळीकरीता गांवकरी ,साईभक्तांकडून भिक्षा स्वीकारण्याकामी मंदिर परिसरात व्यवस्था करण्यात येणार असल्याची माहिती संस्थानच्या मुख्य कार्यकारी अधिकारी भाग्?यश्री बानायत यांनी दिली.
बानायत म्हणाल्या, की राज्य शासनाने ७ ऑक्टोबरपासून महाराष्ट्रातील सर्व धार्मिक स्थळे काही अटी शर्तीवर खुले करण्याचे आदेश दिलेले आहेत. त्यानुसार शासनाच्या मार्गदर्शक तत्त्वांवर श्री साईबाबांचे समाधी मंदिर साईभक्तांच्या दर्शनासाठी खुले करण्यात आलेले आहे. परंतु अजून करोनाचे सावट संपलेले नसल्यामुळे श्रींचा पुण्यतिथी उत्सव साध्या पध्दतीने साजरा करण्यात येणार आहे. तसेच श्रींचा पुण्यतिथी उत्सवाच्या मुख्य दिवशी रुढी परंपरेनुसार भिक्षाझोळीचा कार्यक्रम होत असतो. त्याअनुषंगाने उत्सवाच्या मुख्य दिवशी आयोजित करण्यात येणाऱ्या भिक्षाझोळीकरिता गांवकरी व साईभक्तांकडून भिक्षा स्वीकारण्याकामी मंदिर परिसरातील गेट नंबर ४, पिंपळवाडी रोड गेट नंबर २, चावडी समोर, नाट्यगृहा शेजारी तसेच साईनगर मैदान येथे काऊंटर्सची व्यवस्था करण्यात येणार आहे. तरी गांवकरी व साईभक्तांनी भिक्षाझोळीत दान भिक्षा देतांना मास्कचा वापर करावा व सामाजिक अंतरासंदर्भातील नियमांचे पालन करुन भिक्षाझोळी काऊंटरवर दान भिक्षा जमा करावी. तसेच संस्थानचे संरक्षण व दान भिक्षा स्वीकारणारे कर्मचाऱ्यांना सहकार्य करावे,असे आवाहन संस्थानच्या वतीने करण्यात येत आहे.
उत्सवाच्या प्रथम दिवशी १४ रोजी पहाटे ४.३० वाजता श्रींची काकड आरती, पहाटे ५ वाजता श्रीं च्या फोटोची व पोथीची मिरवणूक, पहाटे ५.१५ वाजता द्वारकामाईत श्री साईसच्चरिताचे अखंड पारायण, पहाटे ५.२० वाजता श्रींचे मंगलस्नान, सकाळी ६ वाजता श्रीं ची पाद्यपूजा, दुपारी १२.३० वाजता माध्यान्ह आरती, दुपारी ४ ते ६ यावेळेत कीर्तन कार्यक्रम होणार आहे. १५ ऑक्टोबर हा श्रींचे पुण्यतिथी उत्सवाचा मुख्य दिवस आहे. या दिवशी नित्याचे धार्मिक कार्यक्रम, तर सायंकाळी ५ वाजता खंडोबा मंदिर येथे सीमोल्लंघन कार्यक्रम होईल.उत्सवाच्या तिसऱ्याआणि चौथ्या दिवशी नित्याचे धार्मिक कार्यक्रम होतील.